Diseña un sitio como este con WordPress.com
Comenzar
Destacada

II Certame literario do IES Espiñeira

  1. Convócase o II Certame Literario de Narración Curta do IES Espiñeira, organizado pola Biblioteca Safo. Poderá participar todo o alumnado do centro. A temática será libre dentro de cada categoría.

2. Os traballos deberán estar escritos en lingua galega.

3. Establécense 3 categorías:

 A. Relatos que comecen ou inclúan a frase «de repente saíu do río»

 B. Carta manuscrita.

 C. Lenda ambientada en Boiro ou a súa comarca.

4. Os premios consistirán en diferentes vales para mercar libros ou material nunha libraría de Boiro.

Para cada categoría:

PRIMEIRO PREMIO:   30 EUROS e Diploma

SEGUNDO PREMIO: 20 EUROS e Diploma

5. Todos os traballos seleccionados e premiados serán ademais publicados no blog da Biblioteca Safo, e poderán ser difundidos por outros medios.

A entrega de premios terá lugar, nun acto público no Salón de Actos do centro, coincidindo coa Semana do Día do Libro, en data e hora que se concretará e da que se informará.

6. En calquera das categorías o premio poderá quedar deserto se o xurado considera que os traballos non acadan un mínimo de calidade, ou non se axustan ás bases.

7. Os textos terán unha extensión mínima dunha páxina e máxima de 3, escritos a man unicamente na categoría B, na que se valorará a caligrafía e presentación, ou a duplo espazo en Arial 12 nas outras categorías. Sen asinar,  entregaranse dous sobres pechados na caixa de correo situada na conserxería do centro para tal fin.

8. Tanto os sobres como a impresión dos textos serán facilitados polo conserxe.

Conserxería: sobre 1 e sobre 2

9. O sobre 1 debe llevar escrito en lugar visible a categoría pola que se presenta e a palabra TEXTO. Dentro do sobre aparecerá o título e a narración e non levará sinatura nin ningún elemento identificador da súa autoría.

10. No sobre 2 aparecerá en lugar visible a palabra DATOS, no seu interior deberá constar o título da obra e os datos persoais do autor ou autora e o grupo ao que pertence.

11. A organización garantirá o anonimato dos participantes para que os membros do xurado poidan  fallar as obras premiadas  atendendo a criterios estritamente literarios.

12. O prazo de entrega rematará ás doce do mediodía do 31 de marzo de 2023.

13. O xurado estará composto polos membros designados pola organización.

14. A presentación no Certame supón a aceptación das bases por parte dos participantes.

Día da visibilidade trans

O alumnado de Xen Z quere celebrar esta data e comparte con vós esta presentación:

Ver presentación

Desde a biblioteca recomendamos as lecturas Identidade, de Nee Barros e George, de Alex Gino para coñecer mellor esta realidade. Ambas están á vosa disposición na biblioteca Safo.

Sororidade, teatro e literatura

A xuntanza deste mes no club de lectura tivo unha invitada moi especial: a escritora Eli Ríos.

Como xa sabedes, no noso club non nos limitamos a ler as obras, senón que as vivimos con intensidade. Por iso, e aproveitando que onte foi o Día do Teatro, agasallamos á autora cunha representación teatral da primeira escena do libro Remexido de patacas.

Alejandra púxose na pel da protagonista namentres Carmen interpretaba a unha enfermeira.

Irimia foi a encargada de arrancar o evento e presentar a unha Eli Ríos que, con moito humor, foi contestando a todas as preguntas sobre o proceso de escritura do libro, a documentación que precisou para escribilo, e desvelando as diferentes lecturas ás que podemos chegar a través de Remexido de patacas.

O libro dou pé tamén a falar de temas moi serios como o maltrato e a desigualdade de xénero e de como combatelos con sororidade, tecendo redes de afectos.

Agrademos a implicación de todo o alumnado do club que participou dalgún xeito no encontro de hoxe, e a Lucía, a maquilladora.

E por suposto a Eli Ríos por compartir connosco esta tarde no universo pataqueiro.

As mil e unha voces do poema

Que é a poesía? Con esta cuestión comenzaba hoxe Carlos Negro un recital poético dirixido ao alumnado de segundo de ESO.

A través da poesía podemos falar das emocións, do amor, da morte, pero tamén do estrés da vida, da lingua galega ou das Barbies vestidas de rosa.

A actividade celebrouse na Biblioteca Municipal de Boiro, organizadora do evento.

Carlos Negro non se limitou a ler poemas. A interpretación que facía en cada recitado enganchou a un público adolescente que coreaba os versos segundo el marcaba o ritmo.

Escoitamos poemas descoñecidos e outros, dos libros Makinaria e Penúltimas tendencias, xa traballados nas clases de galego coa profesora Sandra Silva. Rematamos do mellor xeito posible, comendo chocolate e saboreando poemas.

Parecen un simples obxectos

No corredor da biblioteca están expostos os traballos de escritura creativa do noso club de lectura.

No libro Remexido de patacas, de Eli Ríos, o que parecía un inocente tubérculo convértese nun obxecto poderoso. Aproveitando esa idea os nosos Papalibros fixeron un exercicio de imaxinación e dotaron de poderes máxicos diversos elementos.

Un reloxo, unha chaqueta, un estoxo,.. Pasa a ver a exposición e descobre as historias agochadas en cada obxecto.

Recital poético

Conmemoramos o día da poesía coa asistencia este venres á charla e recital poético para 2° de ESO que organiza a Biblioteca Municipal de Boiro na Casa da Cultura, dentro das actividades propostas cun grupo de traballo no que participan as bibliotecas dos centros educativos do concello.

A actividade leva por título «As mil e unha voces do poema», e será impartida por Carlos Negro, autor de obras como Makinaria ou Penúltimas tendencias.

Traducidos ao galego

Estes tres títulos están xa dispoñibles na biblioteca.

Cerráronseme os ollos

Encérrase nas redes sociais, muda a súa vestimenta, o seu pensamento… Maëlle convértese en Ayat para unirse ao Daesh. A impactante historia dunha moza francesa que retorna de Siria.

Soñan os androides con ovellas eléctricas?

A novela que deu pé á película «Blade Runner» é unha obra de culto no xénero da ciencia ficción que nos sitúa ante un planeta Terra devastado por unha guerra nuclear e cuberto por unha nube radiactiva. Un escenario apocalíptico para cuestionarnos os límites entre o natural e o artificial, a decadencia da sociedade…

O que lle aconteceu a Barnaby Brocket

O terceiro fillo do señor e da señora Brocket -uns fanáticos da «normalidade»- naceu flotando e desafiando a lei da gravidade. Tras botalo da casa, Barnaby coñece mundo e fai amigos que, coma el, representan a diferenza e a diversidade nun mundo pouco tolerante.